Að ferðast er eiginlega bara það besta sem ég veit. Ég læri hvergi eins mikið eða nýt mín eins mikið og þegar ég er að ferðast. Að kynnast nýjum menningarheimum, siðum og venjum, sjá ótrúlega náttúru og dýr, að kynnast nýju fólki og stöðum er klárlega besta fjárfesting sem ég geri. Ég er viss um að ef að þú ert í svipuðum hugleiðingum eða langar að fara í draumferðina þína þá get ég pottþétt hjálpað þér við að púsla einhverri snilld saman. Sjálf hef ég ferðast mikið og elska fátt meira, svo það má segja að ég sé einstaklega ástríðufullur ferðalangur.
Ég er 24 ára tómstunda- og félagsmálafræðingur, uppalinn Kársnesingur, en bý í Garðabæ núna. Ég er líka fyrrum skiptinemi en ég var í Nýja-Sjálandi árið 2016 á vegum AFS. Að ferðast hefur alltaf átt hug minn og hjarta og ég í rauninni fór að vinna eins og brjálæðingur um leið og ég gat, til þess að geta átt aukapening og komist til útlanda. Ferðirnar sem eru mest framandi og kannski óhefðbundnari hafa líka heillað mig hvað mest en ég hef mikinn áhuga á sögu, menningarheimum og mismunandi siðum og venjum. Til að mynda bjó ég hjá Maori fjölskyldu í Nýja-Sjálandi í ár þar sem ég kynntist þeirra menningu einstaklega vel og mér þótti hvað vænst um að hafa fengið að upplifa það svona náið.
Ég fór svo í tæplega fjögurra mánaða reisu á vegum Kilroy líka árið 2019 en þá fór ég til Afríku, Asíu og Nýja-Sjálands. Ég lærði að kafa í Tanzaníu, surfa í Marokkó, fór í safari í Suður-Afríku, kaffiboð uppi á fjalli í Eþíópíu og vann með fílum í Tælandi svo fátt eitt sé nefnt.
Ég er alltaf eitthvað á ferðinni en næst á dagskrá hjá mér er Mið- og Suður-Ameríka, og að labba að Machu Picchu í Perú, ég er mjög spennt að skoða það svæði í heiminum og kynnast menningunni þar!
Heyrðu endilega í mér og við getum sett upp einhverja snilld í sameiningu!:)