8 hlutir sem þú verður að upplifa á Fiji

Fiji samanstendur af fleiri en 300 eyjum, svo það liggur í augum uppi að eyjahopp er besta leiðin til þess að kanna landið! Þú getur bókað ýmsar mismunandi siglingar ásamt því að hafa möguleikann á að setja saman þína eigin ferð með hop on hop off miða.

Það er algjört möst að snorkla þegar þú heimsækir Fiji. Þar er svo fjölbreytt og litríkt sjávarlíf að Fiji er eins og náttúrulegt, risastórt fiskabúr. Yasawa eyjar eru besti staðurinn til þess að snorkla og ef heppnin er með þér gætir þú séð hákarla og skötur synda rólega fram hjá þér. Settu á þig snorklgrímuna og skelltu þér í hlýjan sjóinn. Svo er fullkomið að enda daginn á nuddi á ströndinni! 

Þú getur ekki farið frá Fiji án þess að hafa smakkað Kava! Kava er búið til úr Kava rótinni og vatni, og það er mikilvægur partur af félagslífi Fídjíbúa. Þetta lítur út eins og drullupollur og tungan verður dofin, en þú verður samt að smakka! Svo hallaðu þér aftur, njóttu athafnarinnar og spjallaðu við heimamennina. Ef þér dettur ekkert sniðugt umræðuefni í hug mælum við með að þú spyrjir um ruðning! Fídjíbúar dýrka þessa íþrótt!

Að kafa í Fiji er einstakt! Vatnið er tært, skyggnið gott og sjávarlífið vægast sagt magnað! Forvitnir fiskar og litríkir kóralar mynda ótrúlega litafegurð sem erfitt er að trúa að leynist svona nálægt yfirborðinu. Við bjóðum bæði upp á köfunarnámskeið fyrir byrjendur og reynda kafara, auk kafana fyrir þá sem eru þegar með réttindi. Hvað sem þú velur, þá áttu eftir að upplifa ógleymanlegt neðansjávar ævintýri!

Já þetta hljómar svolítið skrýtið, en kirkjan spilar mikilvægt hlutverk í hversdagslífi flestra Fídjíbúa. Sunnudagar eru tileinkaðir messum og allt samfélagið hittist í kirkjunni, fer með bænir og syngur lög sem eru fallegri en þú getur ímyndað þér - Fídjíbúar kunna sko að syngja! Eftir messu er komið að hádegismat þar sem öll fjölskyldan situr saman og spjallar yfir drykk og mat. Ef þú ert heppin(n) verður þér boðið í mat hjá fjölskyldu. Fídjíbúar eru þekktir sem vinalegast fólki í heimi, svo líkurnar eru nokkuð góðar!

Játaðu það bara - við höfum öll séð sjampó auglýsingarnar þar sem konurnar þvo á sér hárið í fullkomnum fossum umkringdar grænum gróðri og litríkum blómum og hugsað, einn daginn mun ég gera þetta! Núna er tækifærið! Á Fiji er fullt af fallegum fossum, en sá allra magnaðasti er Tavoro. Þessi 24 metra foss sem er umkringdur orkedíum og trjám er staðsettur í Bouma National Heritage Park - staður sem oft er kallaður „Fiji’s Garden of Eden‟. Það er margt fallegt að sjá í garðinum og auðvelt er að ganga upp að fossinum.

Söngur og dans er mikilvægur og órjúfanlegur hluti af lífsvenjum Fídjíbúa, og þegar þú upplifir svona athöfn muntu skilja hvers vegna. Hljómsveitin er skreytt með blómakrönsum en dansararnir klæðast hefðbundnum fötum. Konurnar eru í litríkum kjólum með ilmandi kókosolíu, en mennirnir eru í fullum herklæðum. Söngvarnir og dansarnir segja alltaf ákveðna sögu - við ábyrgjumst samt ekki að þú munir ná að fylgja söguþræðinum...

Já það er algjör klisja, en þú bara verður að gera það allavega einu sinni! Komdu þér vel fyrir undir pálmatré með gómsætan kokteil í kókoshnetu og horfðu á sólina hverfa ofan í hafið. Geymdu þetta augnablik vel í huganum - á köldustu mánuðunum hérna heima er gott að geta lokað augunum og ímyndað sér að maður sé kominn aftur í paradís.