Malasía hefur allt
Þú finnur margar fallega perlur í Asíu þar sem hver og ein er einstök og býður upp á fjölbreytni í náttúru og menningu. Malasía er ein af þeim perlum! Þú getur verið viss um að Malasía hafi það sem þú leitar eftir svo lestu áfram og sjáðu okkar 7 ástæður fyrir að Malasía ætti að vera á bucketlistanum þínum.
1. Borgin Kuala Lumpur
Það fyrsta sem tekur oftast á móti þér þegar þú lendir í einhverju landi í Asíu er iðandi stórborg. Það sama á við þegar þú lendir í Malasíu en ólíkt öðrum asískum stórborgum er mjög auðvelt að rata um Kuala Lumpur. Í borginni finnur þú fullt af frábærum matarmörkuðum, menningarlega viðburði og eina bestu bari Suð-Austur Asíu. Við mælum sérstaklega með Raggae Bar í kínahverfinu en stopp þar er frábær leið til þess að hefja djammið í Kuala Lumpur!
2. Fallegar strendur
Frá iðandi stórborg til fallegra stranda. Í Malasíu finnur þú hreinlega frábærar strendur. Í norður Malasíu finnur þú Langkawi meðfram vesturströndinni og Perhentian Islands og Tioman meðfram austurströndinni. Við getum líka lofað þér því, að sama hvort þú velur - þá muntu ekki verða fyrir vonbrigðum. Kristaltær sjór, frábærir snorklstaðir og heitur hvítur sandur. Þarf maður eitthvað meira?
3. Borneó
Þrátt fyrir fréttir um eyðingu skóga í Borneó finnur þú ennþá eitt besta og fjölbreyttasta dýralíf heimsins á eyjunni. Því er að þakka mörgum dýralífsverndunarverkefnum sem vernda stóran hluta frumskógarins. Það er því vel þess virði að heimsækja Borneó!
Malasía deilir Borneó með Indónesíu en nokkrir hápunktar Malasíuhliðarinnar eru köfun við Sipadan (á norð-austurströndinni), dýralífið (þar á meðal órangútar), fjölmörgu þjóðgarðarnir, gangan upp Mt. Kinabalu og hátíðirnar í Kuching.
4. Matarmenningin
Malasía býður upp ótrúlega matargerð og því er að mörguleiti menningunni í landinu að þakka. Þar finnur þú fullkomna blöndu af mat undir kínverskum, indverskum og malasískum áhrifum. Malasía er þekkt fyrir bragðsterka rétti og ferskt grænmeti. Við mælum með að þú prófir Curry Laksa, Maggi Goreng, Rendang og Sambal Udung.
5. Gangan upp Mt. Kinabalu
Ef þú ert hrifin/n af ævintýrum og að reyna á þig þá skaltu endilega nýta tækifærið þegar þú ert í Malasíu og ganga upp hæsta tind landsins, Mt. Kinabalu. Fjallið er á heimsminjaskrá UNESCO þar sem lifa yfir 6000 tegundir af plöntum og yfir 326 tegundir af fuglum. Það þarf því varla að nefna að ganga upp fjallið er stórkostlega falleg. Þessi ganga er mjög vinsæl svo við mælum með að bóka hana tímanlega.
6. Staðsetning Malasíu
Það er frábært að fara til Malasíu ef þig langar að heimsækja bara eitt land í ferðinni þinni, en það er ennþá betra að fara til Malasíu ef þig langar að heimsækja nokkur! Malasía er hentuglega staðsett á milli Indónesíu, Tælands, Singapore og Filippseyja svo það er gott að ferðast frá Malasíu.
7. Mikið fyrir lítið!
Þrátt fyrir að verðlag í Asíu hafi hækkað undanfarin ár er ennþá frekar ódýrt að ferðast í Malasíu. Ef þú hefur lítið ráðstöfunarfé þá er þetta staðurinn fyrir þig! Hér finnur þú ódýra gistingu, ódýran mat, og ódýrar samgöngur. Auðvitað er hægt að gera vel við sig og gista á flottum 5 stjörnu hótelum en hver myndi ekki frekar vilja vakna í kósí bambuskofa á ströndinni við fuglasöng og niðinn í öldunum!
