Við höfum öll hitt þau. Kannski er það á hostelinu, í ævintýraferð, í surfskóla, í flugi, á strönd eða í miðjum frumskógi....þau eru út um allt! Fólk er ólíkt, en þegar þú ert í heimsreisu hittir þú sumar týpur af bakpokaferðalöngum aftur og aftur...og aftur! Hér eru nokkrar týpur sem við höfum hitt!
1. Gítar-gaurinn
Gítarinn sjálfur er ekki vandamálið. Þörfin fyrir að spila þetta eina lag eða bút úr lagi sem hann kann aftur og aftur er vandamál.
2. Blóðsugan
Þau virka skaðlaus fyrst þegar þau kynna sig, en áður en þú veist af eru þau búin að soga sig föst við þig eins og blóðsugur. Þetta eru óákveðnar týpur sem vilja helst elta þig hvert sem þú ferð og gera allt eins og þú. Þau eru meira að segja til í að breyta ferðaplaninu sínu til þess að geta fylgt þér lengur. Eina leiðin til þess að losna er að virka alveg jafn óákveðin(n) - þá finna þau einhvern annan. Ef þú getur það ekki geturðu prófað að hlaupa í burtu!
3. Know-it-all
Þessar týpur hafa verið alls staðar og geta að sjálfsögðu allt, það segja þau allavega sjálf. Þau vita best hvað þú ættir að gera, hvert þú ættir að fara og þau eru ekki feimin við að segja frá allri sinni reynslu! Leiðbeiningarnar sem þau gefa eru oft góðar, en það hvernig þau segja frá og gefa ráð með niðurlægjandi og neikvæðum tón verður til þess að þú vilt ekki eyða of miklum tíma með þeim.
4. Sóðinn
Þessi týpa lítur út fyrir að hafa verið á stanslausu ferðalagi síðustu 10 árin og ekki komist í sturtu mjög lengi. Þessa týpu finnur þú oftast á hostelum þar sem henni finnst best að dreifa úr dótinu sínu og nota helst öll rúmin í herberginu til þess að geyma draslið sitt.
5. Dreadda-týpan
Það er alltaf einn svona! Hangir oftast með sóðunum (sjá nr. 4).
6. Fulla týpan
Háværa týpan sem drekkur miklu meira en allir hinir. Það er aldrei góð hugmynd. Týnir oft vegabréfinu sínu, peningum og öllu öðru og fær alla til að hjálpa sér að leita - bara til þess að geta endurtekið velgengnina frá kvöldinu áður! Sofnar ALLTAF í vitlausu rúmi.
7. Símasjúklingurinn
Eyðir meiri tíma í að spjalla við fólk heima, uppfæra Facebook status, taka selfies og snap í staðinn fyrir að njóta ferðarinnar. Þú finnur þessar týpur á bak við símana og spjaldtölvurnar. Einhver sem kannast við þetta?
8. Gamli/Gamla!
Við elskum að þú sért orðin(n) gamall/gömul og enn að njóta þess í botn að ferðast og vera bakpokaferðalangur!
9. Ástfangna parið
Að hengja handklæði yfir kojuna er ekki hljóðeinangrandi. Við vitum hvað þið eruð að gera og við þolum ekki að lenda í herbergi með ykkur!
10. Skjaldbakan
Þú sérð þessa týpu rölta niður götuna með risastóran bakpoka á bakinu og minni poka framan á sér. Býr bókstaflega í bakpokanum og er orðin að einhverskonar ferða-vélmenni. Á mjög töff úrval af ferða-græjum!
Nú þekkir þú týpurnar og kominn tími til að skella sér í bakpokaferðalag! Skoðaðu hugmyndir að heimsreisum hér!
