Það er einstök upplifun að kanna borgina Punta Arenas sem stendur í Patagóníu í Chile. Þessi syðsta borg heimsins er byggð af sjómönnum, viðskiptajöfrum og fjárbændum og allir áhugamenn um útivist elska hana. Þaðan er eintakt útsýni til hinnar fjarlægu ísheimsálfu, Suðurskautslandsins, en einnig er frábært útsýni yfir firði Chile. Endalausar andstæður og fegurðin í landslaginu gera þennan stað virkilega áhrifamikinn!
Syðsta borg veraldar
Punta Arenas er höfuðborg Magellan og Chilean Antarctic svæðisins sem er staðsett á Peninsula de Brunswick. Borgin er oft nefnd sú syðsta í heimi og nær hún frá Cordillera del Paine fjöllum í norðri til Cape Horn í suðri. Magellan sundið og Chilean Patagonia eru þekkt fyrir virkilega áhugaverða, einstaka náttúrufegurð. Punta Arenas er um 1418 km. frá strönd Suðurskautslandsins og ef þig langar að heyra ís springa og brotna, farðu þá í bátsferð!
Punta Arenas hefur stundum verið nefnt borgin með rauðu þökin, því rauðmáluð málmþökin voru svo einkennandi fyrir borgina. Nú til dags er borgarmyndin litríkari. Ein af mikilvægustu höfnum í Chile er staðsett í Punta Arenas og þú getur fundið áhugaverða hluti um sjóliðssögu borgarinnar í Naval y Marítimo safninu.
Plaza de Armas, einnig þekkt sem Plaza Muñoz Gamero, er miðja borgarinnar. Flestir gistimöguleikarnir eru nálægt þessu torgi. Þar má finna mjög góða veitingastaði með góðum chileskum mat; prófaðu centolla – kóngakrabba og aðra ferska fiskrétti frá svæðinu, þú munt ekki sjá eftir því! Næturlífið er líka betra en margir halda þannig að búðu þig undir að kíkja á nokkra pöbba.
Punta Arenas er oft upphafsstaður fyrir ferðalög til Suðurskautslandsins svo þú munt pottþétt heyra spennandi ferðasögur á barnum og ef þú passar þig ekki gætir þú óvart skráð þig í ferð á suðurskautið! Slíkar ferðir kosta sitt, svo vertu viss um að ræða vel verðið fyrirfram.
Mirador Cerro de la Cruz er ekki langt frá torginu. Þaðan er frábært útsýni yfir borgina og við sjóndeildarhringinn getur þú séð eyjarnar Tierra del Fuego, Mount Sarmiento og suðurhluta Brunswick skagans.
Þjóðgarðar Chile - með þeim fallegustu í heimi
Langar þig að sjá mörgæsir? Skoðaðu þá Monumento Natural Los Pingüinos þar sem flokkur af 50.000 mörgæsapörum býr! Til að komast á þennan magnaða stað verður þú að taka ferju til Isla Magdalena sem er í Magellan sundi. Þetta er klárlega paradís fyrir þá sem elska dýralíf. Ef þú hefur enn ekki fengið nóg af mörgæsum ættir þú að fara til Seno de Otway sem er staðsett um 70 km. frá Punta Arenas en þar eru enn fleiri varpstöðvar mörgæsa.
Alberto De Agostini þjóðgarðurinn er eitt af stærstu vernduðu svæðum landsins. Þjóðgarðurinn býður upp á jökla og firði og þar má finna Darwin Mountain Range og Beagle Channel. Þú getur siglt niður sundið og notið þess að horfa á glansandi jöklana. Í þjóðgarðinum er einnig Pampa Guanaco þorp, en þeir sem hafa áhuga á veiðum ættu ekki að láta það framhjá sér fara. Þjóðgarðurinn býður upp á skemmtilegt dýralíf; þú munt sjá sæljón og fílaseli hlið við hlið ásamt sjóotrum eða „chungungos“. Náttúran er fjölbreytt en sem dæmi má sjá kaniltré vaxa í bröttum klettum.
Punta Reserva Forestal Magallanes er frábært svæði fyrir þá sem eru áhugasamir um útivist (og það sama má segja um allt landið)! Það býður upp á marga möguleika fyrir fjallahjólreiðar eða gönguferðir. Þú getur gengið alla leið upp á Cerro Mirador, einnig nefnt Mt Fenton, og stórfenglegt útsýnið mun ekki valda þér vonbrigðum. Ef þig langar ekki að ganga getur þú tekið stólalyftu upp á topp. Einnig geta allir farið í hestaferð að Fenton, jafnvel byrjendur!
Torres del Paine
Það er ekki hægt að tala um Punta Arenas án þess að nefna frægasta þjóðgarð Chile. Torres del Paine er án efa einn af fallegustu, villtustu og mögnuðustu þjóðgörðum heims. Staðurinn er algjör paradís fyrir útivistarfólk og þar er nóg af fallegum gönguleiðum. Þekktasta kennileitið eru turnarnir þrír sem þjóðgarðurinn dregur nafn sitt af. Þetta eru risastórar og mikilfenglegar klettaspírur sem rísa úr miðjum fjallgarðinum sem nær yfir stóran hluta svæðisins. Það er að sjálfsögðu algjör skylda að fara í göngu hér, en þú getur eytt allt frá einum degi upp í þrem vikum í að labba um svæðið, en í lengri göngum þarf göngufólk að taka með sér tjöld og bera allan mat með sér. Þjóðgarðurinn er á heimsminjaskrá UNESCO og því vinsæll áfangastaður. Gættu þess að gefa þér nógan tíma til þess að skoða þennan gríðarstóra garð.
Það jafnast fátt við þá mögnuðu upplifun að gista í tjaldi í miðjum dalnum, umkringdur niðandi ám, lóðréttum klettaveggjum og sígrænum skógum. Þú skalt þó ekki sleppa því að heimsækja "systur" turnanna þriggja; Cuernos del Paine,
Besti tíminn til að heimsækja Punta Arenas
Mundu að Chile liggur hinu megin á hnettinum svo árstíðirnar eru alveg öfugt við það sem við erum vön. Janúar og febrúar eru vinsælustu sumarmánuðirnir og þá koma dagar þar sem sólin sest ekki. Í júlí og ágúst er vetur og þá er kaldara og meira myrkur. Hafðu í huga að veðrið á þessu svæði getur breyst á svipstundu, líka á sumrin, svo það er gott að hafa alltaf hlýja peysu og regnjakka í töskunni - bara til öryggis!
Að komast á milli staða í Punta Arenas
Auðvelt er að fara fótgangandi um Punta Arenas. Leigubílarnir eru aðeins dýrari en strætisvagnar en mun hraðskreiðari. Það gæti líka verið hentugt að leigja bíl.
Í borginni er engin sérstök rútustöð heldur eru rútufyrirtækin hvert á sínum stað. Þú getur farið með rútu til El Calafate, Coyhaique (tekur heilan dag), Puerto Montt (tekur meira en einn dag), Río Gallegos, Puerto Natales, Ushuaia og Río Grande.
Það er mögulegt að fljúga á milli Santiago og Punta Arenas. Það eru líka flug til Falklandseyja, Porvenir, Puerto Williams, Ushuaia og Río Grande. Einnig er hægt að sigla til Tierra del Fuego og Porvenir.
