New Orleans er stundum nefnd nyrsta borg Karíbahafsins. Borgin stendur við bakka Mississippi árinnar, nærri Mexíkóflóanum. Hluti borgarinnar liggur undir sjávarmáli og þess vegna þarf borgin risavaxna flóðveggi og kröftugar vatnsdælur, til að verjast flóðahættu.
Fellibylurinn Katrina árið 2005 varð flóðvörnunum yfirsterkari, flóðin lögðu stóran hluta borgarinnar í rúst og fækkaði íbúum um næstum helming á meðan á þeim stóð. Þrátt fyrir þessa hörmungar þá er skemmtilegt að heimsækja borgina. Enda eru heimamenn jákvæðir og lífsglaðir.
Franska hverfið í New Orleans
Aðal aðdráttarafl New Orleans er “Franska hverfið”. Það er elsti hluti borgarinnar; húsin eru lýsandi fyrir löngu týndan tíma og þau hafa öll sögur að segja. Franska hverfið er frægt fyrir margar goðsagnir og draugasögur. Húsin eru fræg fyrir byggingarlistina sem einkennist m.a. af fallegum svölum sem oft eru skreyttar eftir árstíðum eða hátíðum.
Mardi Gras í New Orleans
Mest spennandi tíminn í New Orleans í Bandaríkjunum er í kringum Mardi Gras-Kjötkveðjuhátíðina í febrúar eða mars. Ferðamenn flykkjast til Bourbon Street, sem er aðal stræti borgarinnar, og reyna að grípa hinar frægu perlufestar sem “svalarstelpurnar” kasta. Partíið heldur áfram dag og nótt og hátíðin nær hámarki með skrúðgöngum út um allt í New Orleans og öllu Louisiana fylkinu.
Franska hverfið er frábær staður til að versla, þar er mikið úrval af litlum, sérhæfðum verslunum; lista- og handiðnabúðum, fataverslunum, minjagripabúðum og allt þar á milli.
Prófaðu skoðunarferð um New Orleans
Það er til fullt af skoðunarferðum um New Orleans; ef þú vilt prófa eitthvað óvenjulegt, farðu í eina af draugasöguferðunum. Það er söguleg skoðunarferð um Franska hverfið þar sem leiðsögumaðurinn segir litríkar sögur um frægar byggingar á svæðinu og ferðin er ennþá meira spennandi því hún er farin að nóttu til. Fyrir þá sem hrífast af krókódílum er hægt að fara í fenjaferð, og til að upplifa gamaldags siglingarandann er hægt að fara í bátsferð um Mississippi ána á gömlum gufubát. Þar að auki er boðið upp á Vúdú ferðir, en þær eru ekki fyrir viðkvæma!
Sérréttir New Orleans
Hinn frægi “soul food” matur New Orleans er annaðhvort Creole eða Cajun matur. Sérréttir staðarins eru t.d. Gumbo og Jambalaya, og ef þig langar í sætindi, prófaðu beignet, kleinuhring úr Franska hverfinu, eða ef þig langar í snarl fáðu þér Muffuletta, sem er sérstök samloka Louisiana. Það er eitthvað fyrir alla og Franska hverfið er troðfullt af allskyns veitingarstöðum og kaffihúsum sem bjóða upp á allskonar mat.
“Fellibylurinn”
New Orleans er líka fræg fyrir “Fellibylinn” - og þá meinum við ekki stormana sem koma við og við frá Mexíkóflóanum. “Fellibylur”, eða “Hurricane” er vel þekktur kokteill sem var fundinn upp í New Orleans. Hann er eins og ástaraldin á litinn og sagt er að hann hafi verið fundinn upp af Pat O’Brien, sem rak krá í New Orleans. Á fimmta áratugnum þurfti hann að losa sig við fullt af rommi sem hann neyddist til að kaupa af áfengisverslunum staðarins áður en hann mátti kaupa annað áfengi. Hann hellti blöndunni í glas sem var í laginu eins og gaslukt (eða “fellibylja lampi” eins og þær kallast þar), og gaf sjómönnum það ókeypis. Drykkurinn varð vinsæll og hefur verið klassískur í Franska hverfinu síðan þá. Þú getur ennþá pantað þér “Fellibyl” hjá Pat O’Brian - það er skylda þegar þú heimsækir New Orleans!
Djazz í New Orleans
Annað sem þú mátt ekki láta framhjá þér fara í New Orleans er tónlistin, burtséð frá hvaða vikudagur er eða hvar þú ert, þá er alltaf bar eða klúbbur nálægt með “live” tónlist. Djass er aðal stefnan og Louis Armstrong, ein helsta djass hetja sögunnar, kom einmitt héðan, en þú munt finna marga klúbba sem spila tónlistina hans.